سناء الشريف تكتب عن: قواعد الأنثى الأربعون

19 أبريل 2018
الكاتب :  سناء الشريف
224 الزيارات

رأي شخصى اعملى بيه او ارفضيه.. قواعد الانثى الأربعون :


١-اشتغلى ماتخليش جوزك او باباكى او اخوكى مصدر رزقك 
٢-ولادك مش كل حياتك ولا حاجه ولادك جزء من حياتك ربيهم عشان ربنا هايحاسبك عليهم بس ماتنسيش نفسك عشانهم مسيرهم ح
ايسيبوكى ويشوفوا حياتهم 
٣-انت مش مسؤله شرعاً ولا قانوناً عن التنظيف او الطبخ ولا انك تبقى شغاله وطباخه وسفرجى وسواقه هاتى حد يساعدك لو جوزك مش حايساعدك
٤-جوزك مش جنى المصباح ولا صانع المعجزات هو بنى آدم مش هو اللى لازم يفسحك ويخرجك و يشتريلك ويكون معاكى فى كل حته انت كيان فى ذاتك
٥-ابوكى وأمك اكتر حد بيحبك ومش مستنين منك حاجه لو عايشين خليكى تحت رجليهم 
٦-اهم علاقه فى حياتك علاقتك بربنا ماتقطعيهاش ابدا ً كلميه وناجيه قربى منه اوى بصدقه بكلمه حلوه لحد بشق تمره زى ما قال نبينا 
٧-اقرى كل يوم ولو صفحه من قرآنك/انجيلك وافهميها واعتبرى منها
٨-افخرى دايما بعيوبك وماتداريهاش مناخيرك الكبيره شعرك الكيرلى مقاس رجلك الكبير اوى او الصغير اوى
٩-اللى ماتجوزتش اوا تجوزت وماتوفقتش انت ملكه زمانك انت حره نفسك..انت أنثى كامله
١٠-اتعلمى طول ما انت عايشه وفيكى نفس هوايه..لغه..موسيقى 
١١-العبى رياضه حتى ولو تمارين فى البيت ارقصى بلدى..زومبا المهم ان جسمك يتحرك (شغل البيت مش حركه)
١٢-حبى نفسك اوى ودلعيها هاتى احسن كريمات وبارفانات وماسكات أوعى تستخسرى فى نفسك
١٣-اخرجى ولو مره فى الشهر مع صحابك اللى بتحبيهم بتوع الجامعه او المدرسه او قرايب انت بتتبسطى معاهم
١٤-اقرى كتاب لازم يكون فى ايديكى كتاب بتقرى فيه ان شاء الله تخلصيه فى شهر ماتقوليش ماليش تقل على القرايه
١٥-البسي حلو حتى لو نازله تشترى الخضار انت بتلبسي عشان نفسك مش عشان حد 
١٦-ابعدى عن اى حد بيديكى طاقه سلبيه وماتقريش بوستات انا زهقانه وحرانه وبردانه والحياة وحشه وغدر الاحبه بلاش جو اغانى الميكروباصات ده
١٧-اسمعى موسيقى اى موسيقى مش لازم اغانى بلوز -چاز-عود -قانون
١٨-خلى لمكان اللى انت فيه ريحته حلوه بفواحه او عود بخور او ريحه كيكه فى فرنك
١٩-اعملى unfriend لاى حد مالوش لزمه بيتلصص عليكى وبس مش بيحبك بصدق حياتك الافتراضية انت حره فيها ملكك لوحدك دخلى الى يعجبك بس
٢٠-ماتشتريش اون لاين غالبا حايضحك عليكى وحاتفقدى متعه تجربه الحاجه وفحصها والخروج عشان تجيبيها
٢١-اعملى صداقات جديده فى اى مكان بتروحيه من جيران او مدرسات ولادك صحاب صحابك قرايب قرايبك
٢٢-كل ماتعملى اكله حلوه دوقى جارتك وكل ماتشترى حاجه لقطه هاتى لصاحبتك او اختك حتى لو هى ما طلبتش منك
٢٣-اصحى كل يوم ألصبح اغسلى وشك وعاكسي نفسك فى المرايه وقولى النهارده حايبقى يوم حلو ده مش جنان دى حاجه صحيه لعلمك
٢٤-قللى وقت التواصل الاجتماعى الافتراضي وتواصلى تواصل حقيقى
٢٥-اشربى ميه كتير وخدى فيتامين جسمك محتاجها
٢٦-اكفلى حد محتاج قريب منك طفل يتيم -فراش فى شغل جوزك-كناس فى شارعك داده فى مدرسه ولادك ده باب من ابواب الجنه واتفتحلك
٢٧-ما تعمليش اكل كل يوم الدنيا مش حاتخرب لازم يوم فى الاسبوع يكون اكل بسيط على الاد
٢٨-لازم يكون ليكى وقت فى اليوم فيه خصوصيه تشربى قهوتك فى هدوء من غير ما احد يكلمك وعودى اللى حواليكى على انك كده
٢٩-اتعلمى السواقه لو مش بتسوقى ماتستنيش حد يجيبك او يوديكى وتبقى تحت رحمته
٣٠-it’s not too late على اى حاجه اعملى اللى نفسك فيه طالما حايبسطك وفى حدود الادب
٣١-ماتخليش اى نقد يهزك او يأثر عليكى بالسلب خدى من كلام الناس الى فعلا حاساه ونفسك تغيريه
٣٢-خسى لازم تكونى راضيه ع عن شكلك اللقمه الزياده دى حاتضرك وحته الحلويات دى مش أقوى منك والسيجاره مش حاتزود ثقتك بنفسك
٣٣-قبل الجواز ماتخليش خطيبك يشرط عليكى شرط يتعارض عن قناعاتك او فكرك
٣٤-افتكرى ان اى حاجه انت فيها حلوه او وحشه هى من صنيعك انت وبس سواء بالسعى ليها او بسلبيتك فى محاوله تغييرها
٣٥-ماتمشيش فى قطيع ماتتجوزيش عشان صاحبتك اتجوزت وماتتحجبيش عشان صحابك اتحجبوا وما تقلعيش عشان صحابك قلعوا
٣٦-خليكى ست جدعه ملجأ وملاذ لاى حد محتاجلك حتى لو من جواكى تعبانه هونى عليهم ولو بكلمه
٣٧-بلاش فرجه على مسلسلات لانك بتطبقى مشاكلهم عليكى بحذافيراها وحياتهم الحلوه مابتعرفيش تستنسخيها فيجيلك احباط فى الحالتين
٣٨-انصحى صحابك بتجربه موفقه ليكى وماتنصحيهومش بعواطفك او انفعا لاتك لانها غالبا غلط
٣٩-ربى ولادك وشدى عليهم خليهم يخشنوا حياتهم اصعب من حياتنا
٤٠-احتسبى اى خير عند ربنا وماتستنيش من انسان اى احسان او رد للجميل

عن عرب بيزنس

طريقك الى عالم المال والاعمال

مجلة اقتصادية ورقية يتبعها بوابة الكترونية على الانترنت

تواصل معنا عبر الفيس بوك

Top