عرب بيزنس: أمسية شعرية بدار الأوبرا تحتفي بالشاعر ماهر أبو المعاطي

17 مايو 2016
الكاتب :  القاهرة- يوسف حماد
492 الزيارات
ماهر أبو المعاطي أثناء القاء احدى قصائده لجمهوره

يشارك الشاعر المصري ماهر أبوالمعاطي، الملقب بـ "شاعر الميدان" بسبب حب الشباب له ولكثرة قصائده عن مصر والثورة، في الامسية الشعرية التى تستضيفها دار الأوبرا المصرية يوم الخميس القادم بقاعة سينما الحضارة وينظمها منتدى فضفضة للاداب والفنون، حيث يدير الأمسية الشاعر جلال عابدين، كما يشارك فيها أيضا امير القوافي  د. محمود حسن والشاعر الكبير محمد جاويش.

والشاعر ماهر ابو المعاطي هو صحفى وشاعر من مواليد 1977 وقد لمه اسمه بشكل كبير خلال السنوات الماضية، عبر عدد من القصائد الحماسية، التى اخترنا له واحدة منها بعنوان: "سكرة موت"

 

 

سكرة موت....... شعر/ ماهر ابو المعاطي

 

فى سَكرة موت
أنا نايم ومستنى 
قضا ربى 
تطول الرحلة
ماتطولش
أنا مفارق
ماعدش يادنيا 
شئ فارق
أنا صفحة فى كلام مكتوب
وده المكتوب 
على جبينى 
أنا عينى تشوف الموت 
وتضحكله
هاموت مبسوط
أنا واخد كتير منك
وأكمنك
بتاخدى حاجات
قصاد حاجة
مافيش حاجة
لزمن تانى 
يزود بحر أحزانى
أنا عايز أروح للشط
كفاية سنين فى شيل أو حط
وجرى وحوش على الدنيا
ودى فانية 
بتدى فُتات
وياما تحوش
وبرضه الرك عالقسمة وعالمقسوم
يا ميت حى فى الدنيا
مسيرك يوم
تعرف أن الحياة كلمة
تعيش بيها
تموت بيها
وتبنيها
تِعٌلى كل يوم فيها
وتسرى الكلمة فى الملكوت
فيسقط كل ورق التوت
تبان سوءات خريف عمرك
ونفس الكلمة تنهى حياة
وتصبح فى التاريخ ذكرى
تسيب فكرة
تعيش بكرة
وتحكى للى جاى حاجات
يسرى فى الوجود رعشة
يا خلق الله
ده شاعر مات
وكل قصايده رافضه البوح
وصوت حرفه كمان مبحوح
وتقفل جرح تلقى جروح
وكل حاجة صارخة سكات
ويقفل قبر فى العتمة
على أحلامى يسيب كلمة
تنور ضى فى الضلمة
ويبقى الشعر لَذًاتى
ده فى الدنيا
ويفضل وزن حسناتى
ده فى الآخرة
ولا غاوى هيتبعنى
ولا القرآن هيلعنى
ولا الدنيا هتنسى 
حرف من نظمى
وتلقى حفل تأبينى
يناقشوا كل دواوينى
وده شاعر هيرثينى
وده صاحب هيبكينى
ودى زوجة فى أول صف
ودمعة منها نازلة تِرف
وده بيبوس جبين أبنى
وده يمسح فى شعر البت
يراضينى
سامعها تقول وبدموعها
ومين بعدك
ياحضن الأب يكفينى
أنا نفسى أعود تانى
أحوط تانى بدراعى
مافيش داعى
لأفكارى وأحلامى
كفاية أدعى من قلبى
يوفق كل خطواتك
بعز وأمن وسلامة
وأوعى ياروحى يوم تنسى
أى نصيحة من ماما
وأنت يا أبنى دلوقتى
هاسيبك تبقى فى مكانى
ماعدش خلاص بإمكانى
أعود تانى
وخليك أنت سند وأمان
أنا سايب هنا راجل 
قد الصعب ويقابل
يكون تحويطة للأيام
يكون حضنك دفا وسلام
وتبقى أنت اللى بعدى إمام
أنا رايح أشوف أغلى 
أنا رايح مكان أحلى
مافيهش عذاب
مافيهش صراع
مافيهش الآه
أنا رايح لنور الله
أنا رايح لنور الله

-----------------------------

 

عن عرب بيزنس

طريقك الى عالم المال والاعمال

مجلة اقتصادية ورقية يتبعها بوابة الكترونية على الانترنت

تواصل معنا عبر الفيس بوك

Top